«Сенімен болашақ» республикалық қоғамдық бірлестігі жұмысының концепциясы

Миссиямыз

Ата-аналар бірлестігін құру арқылы Қазақстанда саналы ата-аналықтың қалыптасуына үлес қосу.

Стратегиялық мақсаттар

«Сенімен болашақ» Республикалық қоғамдық бірлестігі (бұдан әрі – «Бірлестік») – азаматтардың ерікті бірлесуі нәтижесінде құрылған коммерциялық емес ұйым. Бірлестік Қазақстанның әрбір баласының әл-ауқатын арттыру үшін өзінің құрылымдық бөлімшелеріне (филиалдары мен өкілдіктеріне) елімізде саналы ата-аналықты қалыптастыруда қолдау көрсетеді. Бірлестік жаңа білім алу және қоғамдағы білім мен тәжірибе алмасу алаңына айналатын болады. Әрбір құрылымдық бөлімше қоғамға саналы ата-аналықтың маңыздылығын жеткізу және бұған халықтың назарын аудару мақсатында облыстық, республикалық және халықаралық деңгейде форумдар, семинарлар мен басқа да іс-шаралар өткізетін болады.

Қоғам. Біз отбасы құндылықтарын нығайтып, қоғамда ана, әке мен баланың дұрыс үлгілерін қалыптастыратын боламыз. Қоғамға отбасы құру, баланы жоспарлау мен тәрбиелеуге және баланың денсаулығын сақтау мен үйлесімді дамуына қажетті жағдайлармен қамтамасыз етуге жауапкершілікпен қараудың маңыздылығын жеткізетін боламыз. Сонымен қатар біз қоғамда тұрмыстық зорлық-зомбылық пен буллингке нөлдік төзімділік мәдениетін қалыптастыруға ұмтылатын боламыз.

Ата-аналар. Біз ата-аналардың психологиялық-педагогикалық сауаттылығын арттырып, осыған қатысты білімі мен құзыреттілігін дамытуға және ата-ана мен бала арасындағы тығыз және сенімді қарым-қатынастың дамуына ықпал етуге тырысатын боламыз. Ата-аналарға өз балаларымен конструктивті диалог құрып, өз эмоцияларын, теріс сезімі мен үміттерін балаларына проекцияламай, балаларын дұрыс қабылдауларына көмектесетін боламыз. Сонымен қатар біз ата-аналардың қолдау мен кеңес алатын орнына айналуды және де отбасылармен бірлесіп демалыс және шығармашылық іс-шараларын өткізуді жоспарлап отырмыз. Біздің есігіміз еліміздің әр ата-анасына әрқашанда ашық.

Балалар. Біз еліміздегі әрбір баланың, ата-анасының қамқорлығына толы және денсаулығы мен үйлесімді дамуына қажетті деңгейде көңіл бөлінетін қауіпсіз және бақытты балалық шақта өмір сүру құқығымен қамтамасыз етілуіне көмектесуді көздеп отырмыз. Балалардың әл-ауқатының арттырылуына, оларға қатысты жасалатын зорлық-зомбылық деңгейінің төмендетілуіне және қоғамда аутодеструктивті және суицидті мінез-құлықтың азайтылуына бар күшімізді саламыз. Сонымен қатар буллингтің алдын алуына қатысты оқушылар арасында іс-шаралар өткізу және балалардың жан-жақты дамытылуы мен әр баланың жеке қабілеттерінің анықталуына ықпал ету жоспарымызда бар.  

Мектептер. Зерттеулерге сүйенсек, мектеп пен отбасы серіктес ретінде, ынтымақтаса жұмыс істесе, бұндай үдерістен ең үлкен пайда алатын мүдделі тарап ол – бала. Мектеп пен отбасы балаға білім беруде жауапкершілікті бөлісіп, ортақ мақсаттарға қол жеткізу үшін бірлесе жұмыс істегенде, баланың өз оқуында жақсы жетістіктерге жету және өз үлгерімін арттыру мүмкіндіктері өседі. Біз мектеп пен ата-ана арасындағы серіктестіктің құрылып, тиімді қарым-қатынастың орнатылуын дамытатын боламыз. Мектеп әкімшілігі, мұғалімдер және де ата-аналармен жүйелі түсіндірме жұмыстарын және іс-шараларды өткізу арқылы ата-аналардың мектеп өміріне, баланың оқу-тәрбие үдерісіне белсенділік танытуын арттыруға көмектесеміз.

Бағдарламалар мен жобалар. Біз саналы ата-аналық, балалардың жас ерекшеліктеріне қарай дамуы, жасөспірім психологиясының негізі, бала тәрбиелеудегі тиімді әдістер, баланың бос уақытын ұйымдастыру және т.б тақырыптар бойынша оқу бағдарламалар мен оқу-әдістемелік құралдарды әзірлейміз. Олар қазақтың озық салт-дәстүрлері мен халықаралық тәжірибені қамтитын болады. Біз сондай-ақ еліміздің білім беру және әлеуметтік мәселелерін шешуге бағытталған әлеуметтік жобаларды даярлайтын боламыз. Әлеуметтік жобаларды жүзеге асыру барысында олардың тиімділігінің мониторингін орындаймыз.

Мүдделі тараптар

1. Ата-аналар. Баланың өз уақытының ең көп бөлігін өткізетін орны және оның тұлға ретінде қалыптасатын негізгі ортасы – оның отбасы болғандықтан, біз психологиялық және педагогикалық қолдау көрсететін арнайы платформа құру және ата-аналарға арналған тренинг, жиналыс пен форумдар өткізу, сондай-ақ ата-аналарға тәрбие бойынша оқу-әдістемелік құралдарды тарату арқылы еліміздің отбасыларымен тығыз байланыста жұмыс істейтін боламыз. Сонымен қатар біз әлеуметтік-экономикалық жағдайы төмен отбасылармен, тұрмысы нашар балалардың ата-аналарымен, көп балалы отбасылармен және ерекше қажеттіліктері бар балалардың ата-аналарымен жұмыс істеуді жоспарлап қойдық.
2. Бала. Біз жанама түрде, яғни ата-ана, мектеп және қоғаммен бірлесіп күш салу арқылы және тікелей, яғни балалардың өздерімен бірқатар іс-шара өткізу арқылы балалардың әл-ауқаты мен дамуына және оларды теріс ағымдардың әсерінен қорғауға өз үлесімізді қосуға тырысамыз. Мектеп оқушыларымен балалар лагері мен үйірмелер, экскурсия мен пикниктер, отбасылық спорттық және шығармашылық фестивальдер, концерттер мен т.б. сауықтыру және мәдени іс-шараларды өткізетін боламыз.
3. Психологиялық және педагогикалық қауымдастық, социологтар, этнографтар мен тарихшылар. Біз «Сеніммен болашақ» жобасы аясында мектеп әкімшілігіне, психологтар мен педагогтерге ата-аналармен тиімді қарым-қатынас орнату тақырыптарына тренингтер өткіземіз. Сонымен қатар біз мектеп әкімшілігін, педагог, психолог, социолог, этнограф пен тарихшыларды өз мектебінің/қаласының ата-аналары мен оқушыларына тренинг өткізуге және бала тәрбиесіне қатысты оқу-әдістемелік құралдарды әзірлеуге ынталандырамыз.
4. Отбасы мен балалардың құқықтарын қорғау жөніндегі мемлекеттік органдар мен ведомстволар (Білім және ғылым министрлігі, Ішкі істер министрлігі, Еңбек және халықты әлеуметтік қорғау министрлігі, Денсаулық сақтау министрлігі, Ақпарат және қоғамдық даму министрлігі және жергілікті атқарушы органдар) отбасыларға, мектептерге және статистикалық деректерге қолжетімділікпен қамтамасыз ету арқылы және Бірлестіктің миссиясы мен стратегиялық мақсаттарына жетуде қолдау көрсетеді. Біз олардан Бірлестіктің түрлі іс-шараларын жүзеге асыруда және өткір әлеуметтік мәселелерді шешуде көмегін сұрайтын боламыз. Мемлекеттік органдармен жұмыс жасау бағыттары мысалдарының бірі мектептердің шаруашылық және оқу-материалдық базасын нығайтуда, мектептерде қажетті санитарлық-гигиеналық жағдайларды жақсартуда және мектептерді көріктендіруде көмек сұрау болып табылады.
5. Үкіметтік емес және халықаралық ұйымдар да Бірлестікпен тиісті жұмыс бағыттары бойынша өзара әрекеттесетін Бірлестіктің серіктестері болады.
6. Қоғам қайраткерлері, өз еркімен келген саналы ата-аналар, меценаттар және бизнес өкілдері – Бірлестіктің мүшелері бола отырып, Бірлестіктің қызметін жүзеге асыруда қолдау көрсетеді. Олар өз білімі мен тәжірибелерімен бөлісіп, қоғамда ағартушылық жұмыспен айналысатын болады.

Жұмыс қағидалары мен құндылықтар

Бірлестік өз қызметінде келесі қағидаларды басшылыққа алады:

1. Заңдылық 

Бірлестік өз қызметін жүзеге асыруда Қазақстан Республикасының Азаматтық кодексіне, “Коммерциялық емес ұйымдар туралы” Қазақстан Республикасының Заңына, "Қоғамдық бірлестіктер туралы" Қазақстан Республикасының Заңына және Бірлестіктің қызметіне қатысты Қазақстан Республикасының басқа да заңнамалық актілері мен осы Жарғыға сәйкес жұмыс атқаратын болады. Халықаралық қатынастар саласында халықаралық құқық нормаларына сәйкес әрекет ететін болады.

1. Жауапкершілік

Бірлестік мүшелері, қызметкерлері, волонтерлері мен серіктестері мемлекет пен қоғаммен жүктелген жауапкершіліктің деңгейін түсініп, Бірлестік миссиясына қол жеткізу үшін қызмет етуге дайын.

1. Өзін-өзі жетілдіру мен кемелдену

Бірлестік саналы ата-аналықты дамытуға бағытталған жаңа білім мен әдістерді іздеу, өзін-өзі жетілдіру, сонымен қатар осы қағиданы қоғамға таратуда үздіксіз ұмтылатын болады. Нәтижесінде ата-аналар мен балалардың да өмір бойы білім алу ынтасын көтергісі келеді.

1. Ұлттық және рухани құндылықтарды дәріптеу

Бірлестік Қазақстандықтардың ұлттық және рухани құндылықтарын дәріптеп, “Рухани жаңғыру” бағдарламасының рухани және отбасы құндылықтарын қайта жаңғыртуға және ұлттық біртектілікті сақтауға бағытталған бағыттарының жүзеге асырылуын қолдайды. 

1. Адалдық пен ашықтық

Мүдделі тараптармен адалдық пен ашықтыққа негізделген сенімді қарым-қатынас құру. Бірлестіктің қызметі туралы ақпарат толықтай ашық болып, Бірлестіктің ресми вебсайты мен әлеуметтік желі парақшасында орналасатын болады. Бірлестік әрдайым ата-аналармен, оқушылармен және басқа да мүдделі тараптармен диалог құруға дайын.

1. Қамқорлық пен құрмет

Бірлестік өзінің әрбір мүшесі мен қызметкерінің, волонтері мен серіктесінің Бірлестіктің мақсаттарына жетудегі ынтымақтастықта олардың қосатын үлесін бағалап, барлық мүдделі тараптардың әл-ауқаты мен психологиялық жайлылығының қамтамасыз етілуіне көз жеткізеді. Бірлестік бала, ата-ана мен мектептерге басқаларға қамқорлық пен жанашырлық танытуға үйрететін болады.

1. Ынтымақтастық

Бірлестік өзінің Қазақстанның балалары мен отбасы мүдделерінің пайдасына қызмет етудегі ынтасын кеңейтіп, оны нығайту үшін кең ауқымды тұлғалармен және ұйымдармен ынтымақтасып жұмыс істейтін болады. Бірлестік балалар мен ата-аналар, мектеп пен ата-аналар және мектеп пен балалар арасындағы сенімді, қауіпсіз және үйлесімді қарым-қатынастардың дамуына ықпал ететін болады.

1. Толеранттылық

Бірлестік пікір алуандықты құрметтеп, қоғамның барлық мүшелеріне олардың жасы мен жынысы, ұлты мен нәсілі, діні мен әлеуметтік-экономикалық мәртебесі, отбасы статусы мен физикалық немесе білім алу ерекшеліктеріне және басқа да жеке ерекшеліктерге қарамастан, бейтараптық танытады.   

Ата-ана профилі

1. Жауапкершілік. Ата-ана қоғам мен мемлекеттің өзіне жүктеген жауапкершілігін толықтай түсініп, баласының физикалық, эмоционалдық және материалдық әл-ауқатын қамтамасыз ету міндеттемесіне жауапкершілік танытады. Сонымен қатар ата-ана дұрыс отбасылық құндылықтарына шынайы айнымастықпен қарайды.
2. Қамқорлық пен ықыластық.  Ата-ана өз баласына қамқоршы болып табылады.  Ол баласының қандай да болсын мәселелерін дер кезінде анықтап, оған қолдау көрсетіп, бағыт-бағдар беріп, ықылас танытып, қажет болса оларды шешуге көмектеседі. Ол баласымен ортақ уақыт өткізуге бағытталған іс-шараларды ұйымдастырып, жылы және сенімді қарым-қатынас орнатуға тырысады.
3. Өзін-өзі жетілдіру және рефлексия. Ата-ана әрқашан баласының тәрбиесі мен даму психологиясы туралы, оқытудың заманауи және тиімді әдістері туралы кітаптар мен оқу-әдістемелік кешендер арқылы, сондай-ақ тренингтер, форумдар мен конференцияларға қатысу арқылы білім алуға ұмтылады. Оның сыни тұрғыдан ойлау қабілеті дамыған және ол өзінің ата-аналық тәжірибесі туралы рефлексия жасап жүреді. Мәселен, ата-ана ретінде нені жақсы істеп жатқанын, ал немен әлі де жұмыс жасау керектігін, сондай-ақ оның сөздері мен әрекеттерінің баласына қандай салдарын тигізетіні туралы ықыласпен ойланып жүреді.
4. Белсенділік пен ынтымақтастық. Ата-ана өз баласының оқуы, хоббиі мен сабақтан тыс іс-әрекетіне оң көзқараспен қарап, қызығушылық танытады. Ата-ана баласының мектебімен оқу-тәрбие бағытындағы ынтымақтастықта өзара тиімді әрекеттесіп, мектеп өміріне белсенді араласады. Ол әлеуметтік жобаларды жүзеге асыруда Бірлестікпен серіктесіп жұмыс жасайды. Сонымен қатар ол қоғаммен және форумдар мен конференциялар арқылы өзінің тәрбие деген көзқарасы, идеялары мен тәсілдерімен бөліседі.
5. Өз-өзіне сенімділік. Ата-ана өз білімі мен күш-жігеріне сенімді. Ол өз баласының дамуы немесе жас ерекшеліктерімен байланысты қиыншылықтарды шешуден қорықпайды. Оның шешімдері саналы ата-аналық қағидаларына сүйенген болып табылады.
6. Рөлдік модельдеу. Ата-ана бала тәрбиесіндегі рөлдік модельдеудің маңыздылығын түсінетіндіктен, ол әрқашан қамқорлық пен өнегелі мінез-құлық үлгісі болуға, сондай-ақ баласының дұрыс және пайдалы әдеттерінің қалыптасуының жігерлендірушісі, яғни мотиваторы болуына ынталанады.
7. Гармония/үйлесімділік. Ата-ана өмірдің әртүрлі аспектілері: “отбасым – қызметім – өзім” арасында балансты сақтай отырып, үйлесімді өмір сүре алады. Ол салауатты өмір салтын ұстанып, баласына да соны дәріптейді. Оның психикалық және физикалық денсаулығы жақсы. Ол өзінің эмоционалды шаршауын болдырмауға тырысады.