Жаңа ғасырда ата-ананың дұрыс тәрбиесі баланың болашақ ой-санасының қалыптасуына тікелей әсер етеді. Сондықтан отбасындағы баланың тәрбиесіне саналы түрде қарау керектігін насихаттап жүрген «Сенімен Болашақ» РҚБ Алматы филиалы ата-аналармен жұмысын жүйелі жалғастыруда. «Тәрбие тетігі – табысты үштік» тақырыбында М.Әуезов атындағы №128 мектепте өткен кезекті семинар барысында «Мектеп-ата-ана-оқушы» үштігі жайлы кеңінен талқыланды. Бірлестік жайлы мағлұмат пен әсерлі бейнероликтен кейін филиал психологы Қуаныш Қуатқызы баланың жеке басын бағалау жүйесі туралы адамгершілік қатынасқа негізделген қазақ отбасының әдістеме-ұстанымдарымен бөлісті. Және соларды бүгінгі заман талабына сай қалай пайдалану қажеттігін ашып көрсетті. Ата-аналар да өз тарапынан пікірлерін айтып, ұйым ұстанымын қолдайтынын жеткізді. Іс-шара соңында мектеп басшысы Ж.Жұмаділқызы еліміздің болашағы саналы ұрпақ екендігін айтып, сол жолда ауқымды жұмыс атқарып жатқан бірлестікті қолдап, сәттілік тіледі.
