Сенің таңдауың

Еркіндік, таңдау және жауапкершілік: жасөспірімдердің тұлғалық дамуына арналған жоба
Бұл жоба өмірлік қиындықтарға тап болған және тәуекел тобына жататын жасөспірімдерді қолдауға, олардың маңызды өмірлік дағдыларын дамытуға, жеке жауапкершілігін қалыптастыруға және болашағына саналы қарауға бағытталған.
Жобаның басты идеясы – жасөспірімдерге еркіндіктің әрқашан таңдау жасау мүмкіндігімен және сол таңдау үшін жауапкершілік алумен тығыз байланысты екенін түсіндіру.
Бағдарлама аясында қатысушылар тұлғалық даму тренингтерінен өтіп, тиімді қарым-қатынас орнатуды, дұрыс шешім қабылдауды, жанжалдарды сындарлы түрде шешуді және өзін тереңірек тануды үйренді. Сонымен қатар құқық бұзушылықтардың, түрлі тәуелділіктердің алдын алуға және өмірлік берік ұстанымдарды қалыптастыруға ерекше көңіл бөлінді.
Жасөспірімдер қаржылық және жобалық сауаттылық дағдыларын дамытып, тәжірибелік және топтық іс-шараларға, шығармашылық белсенділіктерге, бірлескен еңбекке және әлеуметтік бастамаларға қатысты.
Жобаның маңызды бағыттарының бірі – эмпатияны және әлеуметтік белсенділікті дамыту болды. Қатысушылар қарттар үйіне барып, қайырымдылық шараларына атсалысты, өзгелерге қолдау көрсетуге, құрмет танытуға және қоғам алдындағы жауапкершілікті сезінуге үйренді.
Жоба жасөспірімдердің өз әлеуетін ашуына, өзіне деген сенімділігін арттыруына және тұлғалық дамуға, әлеуметтік бейімделуге әрі саналы болашақ қалыптастыруға қажетті тәжірибелік құралдарды меңгеруіне мүмкіндік берді.